Pasqua e Natale

Pasca e Natale

Natale e Pasca sò cumpagne tale
ca vanno sott' 'o vraccio eternamente.
Chi Pasca dice annòmmena Natale,
e de Natale Pasca vène a mmente.

Eppure ce sta tanta differenza
comme 'a casa d' 'o Papa e 'a casa mia.
Natale porta friddo e sufferenza,
Pasca strascina 'a ggente mmiez' 'a via.

"Buon Natale!", te dice 'o guardaporta,
c' 'o naso 'a for' 'a senga d' 'o cappotto.
"Buona Pasqua!", te strilla, e nun le mporta
si s'è rotta na lastra d' 'o casotto.

"Buon Natale!", te dice 'o farmacista,
e te conzegna 'e ppinnole p' 'a sera.
"Buona Pasqua!", e te pesa a primma vista
l'essenza 'e fior d'arancio p' 'a pastiera.

"Buon Natale!", te dice 'o cusetore,
e te cunzegna 'o piso 'e nu cappotto.
"Buona Pasqua!", e accummencia nu calore
ca te sfila 'a cammisa e 'a maglia 'a sotto.

"Buon Natale!", sta scritto add' 'o barbiere,
e te siente 'o ssapone friddo nfaccia.
"Buona Pasqua!", e 'o rasùlo è nu piacere.
'A nnammurata toia nun te ne caccia...

Chi Pasca dice annòmmena Natale,
ma pè Pasca ce tengo 'a simpatia.
'O sole 'e Pasca nun te pò fà male
e scarfa 'e puverielle mmiez' 'a via.

Pasca porta 'e pesielle, 'a ncappucciata,
ll'aglie nuvelle, 'a cepulluzza, 'o ggrano;
te porta n'aria fresca e profumata
ca l' 'e desiderata n'anno sano.

Te porta ll'uocchie nire 'e chi vuò bene,
ca te vieneno a dì: "Facimmo pace"...
Ll'uocchie ca nun cunosceno catene
tu sulamente a Ppasca 'e ffaie capace.

"Buona Pasqua!", te dice, e chianu chiano
te pos' 'a capa ncopp' 'a spalla... e aspetta.
E 'a mano va truvanno ll'ata mano...
Ah, benedetta Pasca, benedetta!


(Eduardo De Filippo [1954])


AIUTO:

vraccio: braccio; annòmmena: nomina; strascina: trascina; senga: fessura; lastra: lastra di vetro; ppinnole: pillole; a primma vista: come ti vede arrivare; cusetore: sarto; piso: peso; accummencia: comincia; rasùlo: rasoio; scarfa: riscalda; ncappucciata: varietà di lattuga dalle fitte foglie disposte a palla come nel cavolo; 'e chi vuò bene: di chi ami; 'e ffaie capace: li puoi persuadere.