Dedicata alle madri

Mamma mia

Mamma mia, te tengo attuorno
d' 'a matina nfin' a sera;
vierno pare Primmavera
mò ca staje sempre cu me.

Si fa viento tu me parle,
mmiez' 'o mare sento: "Figlio!".
Si me serve nu cunziglio,
dint' 'o scuro viene tu.

Mamma mia, mamma mia bella...
Quanta vote penzo a quanno
se pò dì ca dint' a n'anno
ce vedevemo sì e no!

Giuvinotto me sentevo
capuzziello, preputente...
Te sò figlio overamente
mò ca nun te tengo cchiù.

(Eduardo De Filippo [1945])


AIUTO:
capuzziello: che vuole primeggiare.

Quanno ce vò, ce vò...

Sarà che siamo in clima elettorale...

Buona visione...ed ascolto,
Porcelain!

Pasqua e Natale

Pasca e Natale

Natale e Pasca sò cumpagne tale
ca vanno sott' 'o vraccio eternamente.
Chi Pasca dice annòmmena Natale,
e de Natale Pasca vène a mmente.

Eppure ce sta tanta differenza
comme 'a casa d' 'o Papa e 'a casa mia.
Natale porta friddo e sufferenza,
Pasca strascina 'a ggente mmiez' 'a via.

"Buon Natale!", te dice 'o guardaporta,
c' 'o naso 'a for' 'a senga d' 'o cappotto.
"Buona Pasqua!", te strilla, e nun le mporta
si s'è rotta na lastra d' 'o casotto.

"Buon Natale!", te dice 'o farmacista,
e te conzegna 'e ppinnole p' 'a sera.
"Buona Pasqua!", e te pesa a primma vista
l'essenza 'e fior d'arancio p' 'a pastiera.

"Buon Natale!", te dice 'o cusetore,
e te cunzegna 'o piso 'e nu cappotto.
"Buona Pasqua!", e accummencia nu calore
ca te sfila 'a cammisa e 'a maglia 'a sotto.

"Buon Natale!", sta scritto add' 'o barbiere,
e te siente 'o ssapone friddo nfaccia.
"Buona Pasqua!", e 'o rasùlo è nu piacere.
'A nnammurata toia nun te ne caccia...

Chi Pasca dice annòmmena Natale,
ma pè Pasca ce tengo 'a simpatia.
'O sole 'e Pasca nun te pò fà male
e scarfa 'e puverielle mmiez' 'a via.

Pasca porta 'e pesielle, 'a ncappucciata,
ll'aglie nuvelle, 'a cepulluzza, 'o ggrano;
te porta n'aria fresca e profumata
ca l' 'e desiderata n'anno sano.

Te porta ll'uocchie nire 'e chi vuò bene,
ca te vieneno a dì: "Facimmo pace"...
Ll'uocchie ca nun cunosceno catene
tu sulamente a Ppasca 'e ffaie capace.

"Buona Pasqua!", te dice, e chianu chiano
te pos' 'a capa ncopp' 'a spalla... e aspetta.
E 'a mano va truvanno ll'ata mano...
Ah, benedetta Pasca, benedetta!


(Eduardo De Filippo [1954])


AIUTO:

vraccio: braccio; annòmmena: nomina; strascina: trascina; senga: fessura; lastra: lastra di vetro; ppinnole: pillole; a primma vista: come ti vede arrivare; cusetore: sarto; piso: peso; accummencia: comincia; rasùlo: rasoio; scarfa: riscalda; ncappucciata: varietà di lattuga dalle fitte foglie disposte a palla come nel cavolo; 'e chi vuò bene: di chi ami; 'e ffaie capace: li puoi persuadere.

L'insalata

'A nzalata

Sta vita è cumme fosse na nzalata
'e tutt'erba mmiscata
e che t' 'a truove
già priparata
dint' 'a nzalatiera;
mmiez' 'a verdura fresca e profumata
nce truov' 'o verme...
e ognuno trova 'o suio;
j' 'a sta' cu ll'uocchie apierte
pecché chillo,
verme cumm'è,
capisce ch'è schifuso
e ca te fà ribrezzo quann' 'o vide,
e allora
s'annasconne mmiez' 'e fronne
no p' 'o scuorno,
ma p'essere magnato;
e ssempe cumm'a verme
sape pure
ca si te trase ncuorpo trova 'a vita.
E già,
pecché t'accide...
e dint' 'e muorte
isso sultanto resta ncumpagnia
cu ll'ati vierme...
Io?
E comme no:
pur'io ll'aggio truvate,
e me ce sò spassato.
Pecché io
tengo 'a pacienza:
'a foglia m' 'a sturèo
'a rinto e 'a fora
e quann' 'o trovo e veco
ca se smerzèa
pè bbia ch'è stato visto
'o piglio c' 'o palicco;
me ce spasso,
'o chiammo a nnomme,
'o metto nomme "Tizio"
o n'atu nomme cchiù pretenziuso,
per esempio:
"Vittorio"...
E nunn'accido.
Che ce mettesse a scamazzà nu verme?
'A nzalata m' 'a magno, certamente.
A isso 'o veco annudo cumm' 'o verme:
annudo e sulo dint' 'a nzalatiera.

(Eduardo De Filippo [1971])


AIUTO:

nzalata: insalata; 'e tutt'erba ammiscata: un misto di tutte le erbe; priparata: pronta; ffronne: foglie; scuorno: vergogna; spassato: divertito; m' 'a sturèo: me la studio, la esamino; 'a rinto: da dentro; se smerzèa: si contorce; pè bbia: perché; palicco: stuzzicadente; scamazzà: schiacciare.

Cuore sperduto

Sciure canzone e surrise...

P' 'o paese d' 'e nnammurate
cammenava "core sperduto".
Comme e quanno c'era arrivato
chi l'avesse saputo dì.

Ce 'o divevano, e nun ce credeva.
Ce avvisavano, e nun 'o ccapiva.
Core, core, si tu me sentive,
nun campasse sperduto accussì.

Tutt' 'a musica 'e chistu paese
ca tu siente, tu sulo l'è ntisa.
E sti sciure ca vide p' 'e ccase
nun nce stanno, e tu 'e vviene 'addurà.

Chesti strade pulite pulite
ca tu vide lucente e allustrate
ca te pareno 'argiento ndurato,
tu nun vide che fango ce sta.

Lass' 'a j' sta palomma. Si 'a piglie
te n'adduone ch'è fatto nu sbaglio.
Lass' 'a j', siente a me, ch'è cchiù mmeglio,
cride tu c' 'a palomma ce sta.

Core core, pè chistu paese
chin' 'e sciure canzone e surrise
addò vanno 'e ppalomme p' 'e ccase,
nun nce aviva nemmeno accustà...

(Eduardo De Filippo [1968])

AIUTO:

sciure: fiori; ntisa: sentita; 'e vviene 'addurà: ne senti perfino il profumo; palomma: farfalla; te n'adduone: te ne accorgi; lass' 'a j': lasciala andare; accustà: avvicinare.

Eccoli qua!

'E vvì lloco

'E vvì lloco, pè mmiezo Tuleto...
Vanno, vèneno, e tornano a gghì.
Nun ne làsseno uno cujeto:
"Chillo è chesto... chill'ato è accussì".

'E ccammìse ch' 'e puze sfrangiate,
'e ggiacchette cu mmacchie accussì.
'E cazune sò sempe scagnate,
e sgranate... addò nun se pò dì.

Sanno vita, miracul' e morte.
Uno parla, e chill'at' a sentì...
'E rresate sultanto sò fforte...
Vanno, vèneno, e tornano a gghì.

Te salutano sempe redenno;
seriamente nun hanno che dì.
"Che se dice? Neh, jate dicenno..."
Chill' è chesto... chill'at' è accussì.

Addevèntano viecchie a Tuleto,
rimbambite p' 'o gghè e p' 'o venì...
Cammenanno, rimànen' arreto,
Vanno, vèneno, e tornano a gghì.

Vanno, vèneno... vanno... Addò vanno?
Manco llor' 'o sapésseno dì.
Se cuntentan' 'e chello che sanno:
"Chill' è chesto... chill'at' è accussì".

(Eduardo De Filippo [1938])

AIUTO:

'e vvì lloco: guardali là; Tuleto: via Toledo; gghì: andare; nun ne làsseno uno cujeto: non lasciano in pace nessuno; chillo è chesto... chill'ato è accussì: quello è questo... quell'altro è così; ccammìse: camicie; puze: polsini; cazune... scagnate: calzoni... scambiati; redenno: ridendo; jate dicenno: raccontate; arreto: indietro.

Le stagioni della vita

'A vita

Io songo nat' 'o millenoviciento
e tengo n'anno.
Tu sì d' 'o sittantotto
e n'anno tiene.
Chillo che dice: "Sò arrivato a ciento!"
tene n'anno pur'isso.

'O calannario nun 'o date retta.
'O calannario è n'atu scucciatore,
ca vuluntariamente
nce 'accattammo
nuje stesse
e nce' 'o piazzammo
vicin' 'o muro
religiosamente.

'A vita dura n'anno.
Tutto 'o ssupierchio è na supirchiaria.
E', cumme fosse, inutile...
Dicimmo a lengua nosta:
"E' p'ingiaria!"

Tu, quanno nasce, allora è primmavera.
E tutt' 'o vverde nuovo
'e chelli ffoglie nove
è na speranza!
E' tutta na speranz' 'e vita allera.
Vide tanta faccell' 'e criature
ch' 'e scuffie culurate:
sò tutt' 'e criaturelle nate morte,
ca tenen' 'o permesso,
na vota all'anno,
'e s'affaccià p' 'o munno...
E teneno diritto a 'o primmo sole:
sò 'e primme viole!

Pò schiòppene garuofane schiavune
e giesummin' 'e Spagna.
'A miez' a mille sciure,
ca sò 'e mille culure,
tu sciglie 'a margarita,
ca t'add'accumpagnàpè tutt' 'a vita.
E, comme ch'è nu sciore
busciardo e traditore,
te dà 'o primmo delore...
te dice: "No!"

Te scite na matina e 'o sole coce.
Coce pecché è ll'està.
Te scite e durmarrisse n'atu ppoco,
ma dint' 'o lietto nun ce se pò sta.
Nfra veglia e suonno,
ll'uocchie mieze nchiuse,
stienne na mana
e cuoglie na cerasa.

'A sera, 'o ppoce 'e frisco
e nun t'adduorme... pecché nun può durmì.
Pienze che vene autunno,
e tu ce pienze
pecché, pò doppo, vierno adda venì.
'E penziere sò assaie,
t'addubbechie.
Sient' 'a voce 'o puntone:
"Chin' 'e fuoco!"
Me par' 'o boia ca taglia
e quanno taglia, sott' 'a curtella,
schioppa nu mellone.

Vene l'autunno e caden' 'e speranze
nzieme cu 'e fronne
e 'o viento 'e fà volà...

Già l'autunno te lass' appecundruto.
Già miezo cunzumato
te trova vierno.
Acqua, trònole e viento,
e tu nzerrat' 'a dinto:
broro vullente!

Spara sti botte,
alluma sti bengale,
arrust' 'e capitune,
ch'è Natale!...
Ncoll' 'e pasture!...
Ca mpunto mezanotte,
nasce 'o Bammino.
Chella, mamma, è devota,
perciò nasce 'o Bammino.

Stu Bammeniello nasce n'ata vota?
Lassat' 'o j'...
Chillu stesso martirio 'e quanno è nato
l'adda turnà a suffrì?

'A vita dura n'anno.
Tutt' 'o ssupierchio è na supirchiaria.
E', comme fosse, inutile.
Dicimm' a llengua nosta:
E' p'ingiaria.

(Eduardo De Filippo [1931])


AIUTO:

'accattammo: compriamo; piazzammo: mettiamo; ssupierchio: superfluo; suprichiaria: eccesso; a lengua nosta: nella nostra lingua; p'ingiaria: per avidità, smodatezza; allera: allegra; faccell' 'e criature: faccine di bimbi; scuffie: cuffiette; schiòppene: sbocciano; garuofene schiavune: garofani rosso scuro; sciure: fiori; scite: svegli; coce: scotta; està: estate; vierno: inverno; t'addubbechie: vai in torpore; 'o puntone: all'angolo della strada; chin' 'e fuoco: pieno di fuoco (rosso); schioppa: sboccia; lass'appecundruto: lascia di cattivo umore; trònole: tuoni; broro vullente: brodo bollente; botte: mortaletti; alluma: accendi; ncoll' 'e pasture: incolla i pastori; lassat' 'o j': lasciatelo stare.

"Sta nguttosa"!

Don Gennaro

For' 'o vascio, 'o cusetore
nchim' 'o quarto 'e na giacchetta.
'A mugliera, 'Onna Ntunetta
se vulesse appiccecà.

Sta nguttosa. S'è scetata
ca nun saccio che vulesse;
'o marito l'accedesse...
nun se fida d' 'o guardà.

Don Errico l'ha capito:
nfila ll'aco, nchima, e aspetta.
"'E lassaa sta scuppetta
ncopp' 'o tondo... adda sta llà?"

"Nonzignore". "Nce sì gghiuto
a parlà p' 'o cuntatore,
ncopp' 'o ggasso?". "Sissignore".
"E nce 'o càgneno?". "Gnorsì".

"L'accattast' 'o contagocce?"
"Sissignore". "E che ssì muto?
T' 'o teniv' annascunnuto...
Addò sta?". "Dint' 'o gilè".

"Io stasera nun cucino,
stongo stanca e nun me cuoglie.
Faccio pane sal' e uoglie...
Tu che ffaje: t' 'o mmangie?". "Sì".

"Nce l' 'e ditto a don Peppino
c' 'a mugliera, Mmaculata,
spann' 'e panne d' 'a culata,
e c' 'e stenne fin' a ccà?

Nce l' 'e ditto?". "Quann' 'o veco"...
"Nun l' 'e ditt' 'o riest' 'e niente!
Let' 'a nanze... ca me siente!...
Io mò vengo... ...Mmaculàaaa!..."
(Eduardo De Filippo)


AIUTO:

cusetore: sarto; nchim' 'o quarto: imbastisce una parte; appiccecà: bisticciare; nguttosa: che cova una lite; scetata: svegliata; l'accedesse: l'ucciderebbe; nun se fida d' 'o guardà: nun ne sopporta la vista; 'e lassata sta scuppetta: hai lasciato questa spazzola; 'o tondo: il tavolo tondo; annascunnuto: nascosto; nun me cuoglie: non m'incastri; uoglie: olio; spann' 'e panne d' 'a culata: spande i panni del bucato; 'o riest' 'e niente: proprio niente; let' 'a nanze: levati da davanti; ca me siente: ora mi sentono!

Quando parlo con te

Quanno parlo cu te

A parlà c' 'a luna e 'o sole
songo buone tutte quante:
nnanz' 'a luna tu te ncante
e te miette a ragiunà.

Spicialmente 'a luna chiena
me risponne a tuono, a ssisco,
e me dice: "Te capisco,
saccio che he' vuluto dì".

Nnanze a te pure me ncanto,
tu però, quanno me siente,
nun capisce 'o riesto 'e niente!
Ma sta luna, fusse tu?

(Eduardo De Filippo [1966])


AIUTO:

ncante: incanti; chiena: piena; a ssisco: a fischio, cioè a proposito; saccio: so; 'o riesto 'e niente: proprio niente.

Il mare e la sua incredibile forza

Durante la mia splendida vacanza a Palinuro, è accaduto un evento davvero spiacevole. L'11 agosto un giovane ragazzo di 26 anni, Pietro Maggiolini, è annegato dopo aver salvato tre sue amiche dal mare fortemente agitato.
A lui e a tutte le persone che hanno perso la vita in mare voglio dedicare questa poesia di Eduardo De Filippo, in cui si parla proprio del mare e della sua spaventosa forza.

'O mare

"'O mare fa paura".
Accussì dice 'a ggente
guardanno 'o mare calmo,
calmo cumme na tavula.
E dice 'o stesso pure
dint' 'e gghiurnate 'e vierno
quanno 'o mare
s'aiza,
e l'onne saglieno
primm' a palazz' 'e casa
e pò a muntagne.
Vergine santa...
scanza 'e figlie 'e mamma!

Certo,
pè chi se trova
cu nu mare ntempesta
e perde 'a vita,
fa pena.
E ssongo 'o primmo
a penzà ncapo a me:
"Che brutta morte ha fatto
stu pover'ommo,
e che mumento triste c'ha passato".
Ma nun è muorto acciso.
E' muorto a mmare.
'O mare nun accide.
'O mare è mmare,
e nun 'o sape ca te fa paura.

Io quanno 'o sento...
specialmente 'e notte
quanno vatte 'a scugliera
e caccia 'e mmane...
migliara 'e mane
e braccia
e ggamme
e spalle...
arraggiuso cumm'è
nun se ne mporta
ca c' 'e straccia 'a scugliera
e vveco ca s' 'e ttira
e se schiaffea
e caparbio,
mperruso,
cucciuto,
'e ccaccia n'ata vota
e s'aiuta c' 'a capa
'e spalle
'e bracce
ch' 'e piede
e cu 'e ddenocchie
e ride
e chiagne
pecché vulesse 'o spazio pè sfucà...

Io quanno 'o sento,
specialmente 'e notte,
cumme stevo dicenno,
nun è ca dico:
"'O mare fa paura",
ma dico:
"'O mare sta facenno 'o mare".

(Eduardo De Filippo [1968])

AIUTO:

accussì: così; gghiurnate: giornate; vierno: inverno; onne: onde; a palazz' 'e casa: alte come palazzi; scanza: risparmia; vatte: batte; arraggiuso: rabbioso; s' 'e ttira: le ritira; se schiaffea: si schiaffeggia; mperruso: puntiglioso; ddenocchie: ginocchia; sfucà: sfogarsi.

Con una vena di tristezza,
vostro Porcelain!

La fantasia

Fantasia

Pigliammoce sta vita comme vene,
llassammo for' 'a porta 'a pucundria,
mparammece a campà c' 'a fantasia:
nce sta cosa cchiù bella pè campà?

'A fantasia se sceta ogne matina,
comme si fosse prencepe rignante,
affonna 'e mane aperte int' 'e brillante
e nun s' 'e ppiglia: che s' 'e ppiglia a ffà?

E che curredo tene! Nu mantiello
ca luce cchiù d' 'o sole e nun è d'oro;
quanno se mena ncuollo stu tesoro,
abbaglia 'a vista: nun se può guardà.

Pò tene nu relogio cumpiacente,
cu sissanta minute d'allegria,
mmiez' 'o quarante liegge: FANTASIA
e fa tà-tì, tà-tì, nun fa tì-tà...

(Eduardo De Filippo [1954])


AIUTO:
pucundria: cattivo umore; sceta: sveglia; luce: luccica; se mena ncuollo: si mette addosso.

Fine e lenta

Fina e lenta

Spaparanze sti llastre 'e stu balcone,
ca quanno chiove fino sì cuntento:
tu t'arricuorde 'e quann' ire guaglione...
ma quanno chiove fino, lento lento.

Guaglione, for' a ll'asteco,
chi nun s'è mmiso sott' 'a capannella?...
"Mammà, me piglio 'e ttàvule d' 'a tàvula
e cu ddoje seggie faccio 'a casarella...
'A pozzo fa?" "Va buono, pigliatelle.
Ma si pò ncasa, e ll'acqua forte scenne,
aiza 'e bancarelle e trasetenne".
..........................................................................

Fermàte ncopp' 'e tìttole,
veco na bella cocchia 'e palummielle:
'O masculo, cchiù ardito, vas' 'a femmena;
chiove fino, ma lloro nun 'o ssenteno,
nun 'o pponno sentì pecchè se vàseno...
E pò è refrisco ll'acqua ncopp' 'e scelle.
S'arapeno 'e ffenest' 'e tutt' 'e ccase,
'e balcune cu ll'ellera addirosa,
chi tir' 'a biancaria ca steva spasa...
E ssaglie chell'addor' 'e terra nfosa.

Cumme fa bene st'aria!
Pò dà sullievo pure a nu malato.
Pè nu ciardino, pò, che refrigerio,
ogne sciore addeventa nnargentato!
Ma cumm'è triste pe' nu nnammurato
stu schezzechìo ca more e ca nun more,
percia e te trase nfin' a dint' 'o core.

Cumme a chi nun vò chiagnere;
cu ll'uocchie fisse e, niente, nun 'e smove
pè nun sbuttà. Ma 'e llacreme sò llacreme!
Cumme t' 'e può tenè si chelle scòrreno?
Ll'uocchie cchiù stanno fisse e cchiù se nfònneno...
E' tale e quale quanno lento chiove.

Nzerrate, rebbazzate stu balcone!
Sta pioggia fina a vuje ve pare bella.
Ma j' mò sò gruosso, nun sò cchiù guaglione,
cumme m' 'a pozzo fà na casarella?
Manco cu segge e ttàvule...
E pure me dispiace si fernesce...
Nu' mporta... Ce staranno quatte nuvole,
però na lenza 'e sole trase e gghiesce!

(Eduardo De Filippo [1927])

AIUTO:

spaparanze: spalanca; chiove: piove; ire: eri; àsteco: terrazzo, solaio; ncasa: aumenta; trasetenne: tornatene dentro; tìttole: tetti; còcchia: coppia; palummielle: colombi; vasa: bacia; refrisco: refrigerio; scelle: ali; ellera: edera; addirosa: odorosa; spasa: stesa; nfosa: bagnata; ciardino: giardino; sciore... nnargentato: fiore... argentato; schezzechìo: acquerugiola; percia: penetra; sbuttà: prorompere in singhiozzi; nfònneno: bagnano; nzerrate, rebbazzate: chiudete, sprangate; lenza: raggio; trase e gghiesce: entra ed esce.

Il mondo delle parole

'O munno d' 'e pparole

Si t' 'o ddico nun me cride
manco si pittass' 'o sole
pecché 'o munno d' 'e pparole
mpara ll'arte d' 'o parlà.

E tu saje ca st'arte è l'arte
ca se sceglie 'o traditore
pecché l'ommo senza core
fa furtuna c' 'o pparlà.

Io, gnorsì, pure sò chillo
c'ha liggiuto e s'è applicato;
c' 'o mestiere s'ha mparato,
e se serve d' 'o pparlà...

Se capisce ca parlanno,
nciucio, mbroglio... e faccio 'ammore.
Ma però tengo nu core
e cu te, che vuò parlà!

(Eduardo De Filippo [1944])


AIUTO:

si pittass' 'o sole: se facessi l'impossibile; nciucio: mi servo di qualunque mezzo; che vuò parlà: rimango muto, perché ti amo.

Quanto è difficile dirlo...

Si t' 'o ssapesse dicere

Ah... si putesse dicere
chello c' 'o core dice;
quanto sarria felice
si t' 'o ssapesse dì!

E si putisse sèntere
chello c' 'o core sente,
dicisse: "Eternamente
voglio restà cu te!".

Ma 'o core sape scrivere?
'O core è analfabeta,
è comm'a nu pùeta
ca nun sape cantà.

Se mbroglia... sposta 'e vvirgule...
nu punto ammirativo...
mette nu cungiuntivo
addò nun nce 'adda stà...

E tu c' 'o staje a ssèntere
te mbruoglie appriess' a isso,
comme succede spisso...
E addio felicità!

(Eduardo De Filippo [1944])

Sbrogliare la matassa

'A matassa

Quanno mòro, sapite che dico
mentre ll'uocchie se stanno chiurenno?
"Menomale, me stongo addurmenno,
chi me chiamma ave voglia 'e chiammà!"

'O telefono sòna? E sunasse...
"Sonasò, campaniè, ca staie frisco!"
Si pò vico se sente nu sisco:
"Sescasè... ave voglia 'e siscà!"

Ce starrà chi 'a vò cotta e chi crura
ncopp' 'a vita 'e stu muorto, e se spassa,
ma cchiù peggio se mbroglia 'a matassa,
spicialmente si 'a vònno sbruglià.

(Eduardo De Filippo [1973])


AIUTO:

sonasò: sta per suona, suona; vico: vicolo; sisco: fischio; sescasè: sta per fischia, fischia.

Che devo fare?!

C'aggia fà?

Chi nasce quatro, dice 'o munno antico,
tunno nun pò murì, more quadrato.
Embè, cu tutto ca me sò mparato,
nce tozzo... e faccio cunto 'e nun tuzzà.

Chi lava 'a capa a l'aseno
nce perde 'o tiempo e l'acqua c' 'o sapone.
Capisco ca chi 'o ddice have ragione...
ma n'accatto sapone p' 'a lavà!

Che fa... Si 'a sapunetta se cunzuma
e 'o fatto 'e campà tonna nun te sona,
te tengo comme sì, quadrata e bona.
I' songo nato tunna, ch'aggia fà?

(Eduardo De Filippo [1955])


AIUTO:

quatro: quadrato; tunno: tondo; nce tozzo: ci batto sopra, mi ci scontro; accatto: compro; nun te sona: non ti va a genio.

Un buon risveglio

Stammatina

Me sò scetato tant' 'e buonumore,
ca, p' 'arapì 'o balcone,
me sò nfilato sulo nu scarpone.
Chill'ato...
no pè dispietto, o pè me cuffià,
s'è annascunnuto...
nun l'aggio truvato...
forse pecché vuleva pazzià.

Me so scetato tant' 'e buonumore:
e me cuccaje cu chella ncacchiatura...
Pè qua' ragione? E chi ne sape niente...
Aissera me credevo,
ve giuro, ca 'o ssapevo...
Essa dicette ca... che ssaccio che...
Io rispunntette ca... che saccio quanno...
Ca nun è nato ancora
chi adda fa fesso a me,
ca sò nu santo...

Ma mò port' 'o ccafè.
Ll'aggio sentuta
c' 'o steva abbrustulenno.

S'è vestuta,
e m' 'o pporta redenno.
E nu surzo pedono nce 'o ppigliammo
for 'o balcone.
E zitto, nun parlammo...
sentènnece cchiù buone
e cchiù felice.
Essa capisce chello ca nun dico,
mentr'io capisco chello ca nun dice.

Ll'aria fresca e pulita d' 'a matina
ce lav' 'a faccia.
'E penziere c' 'e sceglie.
'A cuscienza ce 'annetta.
E quant'è bello,
si 'o saje vedè "napulitanamente",
Napule!
E' bello 'e juorno, ' notte, e a mmatutino.
E quant'è bello 'o nomme p' 'o chiamà!

'Ojllanno, San Martino,
ca se vò fà vedè senza na nuvola...
E i' pure, 'o bbì, tengo nu pede scàuzo...
Sent' 'o ffrisco d' 'a preta.

(Eduardo De Filippo [1941])


AIUTO:

scetato: svegliato; arapì: aprire; cuffià: beffare; pazzià: scherzare; cuccaje: coricai; ncacchiatura: arrabbiatura; aissera: ieri sera; pedòno: per uno; annetta: pulisce; si 'o saje vedè: se lo sai vedere (Napoli è maschile in napoletano); mmatutino: tra l'alba e la mattina vera e propria; 'ojllanno: lo vedi là; 'o bbì: lo vedi; scàuzo: scalzo; preta: pietra.

L'amore secondo Eduardo

L'ammore ched'è?

"Scusate, sapite l'ammore ched'è?"

"L'ammor' è na cosa
c'addora di rosa...
ca rosa nunn'è...
nduvina ched'è?"

"E' rosa?... E scusate, sapite pecché?"

"E' rosa 'o culore
che serve p'ammore.
L'ammore nun c'è
si rosa nunn'è".

"L'addore che c'entra... si rosa nunn'è?"

"Pecché dinto maggio,
se piglia curaggio.
Sentenno l'addore
te nasce l'ammore".

"A maggio sultanto?... E sapite pecché?"

"E' maggio pè n'anno
pè chille c' 'o sanno.
Pè chi nun vò bene
stu mese nun vene".

"E senza l'addore l'ammore nun c'è?"

"Nun c'è... pecché 'ammore
è forte delore,
ca pare na cosa
c'addora di rosa".

(Eduardo De Filippo [1947])

AIUTO:
ched'è: cos'è; addora: odora.

Questa è la vita

'A chiena e 'a vacante

Cu na nutizia bona e n'ata triste
se ne passa sta vita e se ne fuje.
Tu nun fernisce 'e dì: "Viate a nuie!",
ca t'he' 'a mettere a dì: "Comme se fa?"

Abbusche mille lire fore mano,
e pienze: "Mò m' 'e spenno a Margellina!"
'A stessa sera, pè na medicina,
ce miette 'o riesto e ll'he' 'a sacrificà.

E' nu scunfiro! Pecché a cunte fatte
cammine sempe, ncopp'a chistu munno,
cu nu pede pè terra e n'ato nfunno
e si te stanche nun te può assettà.

(Eduardo De Filippo [1954])

AIUTO:

fuje: fugge; viate a nuie: beati noi; abbusche mille lire fore mano: guadagni mille lire in più, extra; spenno: spendo; scunfiro: sconforto; nfunno: in fondo; assettà: sedere.

Fotografia di Napoli (...o dell'Italia?!)

‘O paese ’e Pulicenella.

Pulicenella sapìte che dice?
Ca paese significa munno.
Sape solo ch’è la largo e ch’è tunno;
E nun tene pariente né amice.
Dice “ ’O cunto purtatel’ a me”.
Pulicenella sapìte chi è?
…Perepè …perepè …perepè.

Pulicenella è padron’ ‘e Paese.
Pulicenella fa tutt cos’ isso.
Pulicenella, si arriva nu fisso,
ca vulesse… che saccio… fà spese…
Dice “ ’O cunto purtatel’ a me”.
Pulicenella sapìte chi è?
…Perepè …perepè …perepè.

Pulicenella ‘o sapìmmo ca tene
tutt’e vizie d’ ‘a rosamarina.
E perciò ca se sceta matina..
vò sapè … se ntalléa… se trattène…
Dice “ ’O cunto purtatel’ a me”.
Pulicenella sapìte chi è?
…Perepè …perepè …perepè.

Pulicenella, adderet’ ‘o spurtiello
‘e l’ufficio “Domanda e risposta”…
te risponne … ma caro te costa…
ca pè chesto… pè chesto e pè chello…
Dice “ ’O cunto purtatel’ a me”.
Pulicenella sapìte chi è?
…Perepè …perepè …perepè.

Pulicenella sta sempre stunato;
puveriello… nun sap’ e nun sente.
Ma si appura c’ ‘a povera gente,
s’ha mettuto nu sold' astipato…
Dice “ ’O cunto purtatel’ a me”.
Pulicenella sapìte chi è?
…Perepè …perepè …perepè.

Pulicenella nun tene giudizio;
nun ce penza c’ ‘o tramm’ è scassato.
Si ‘o biglietto l’avite pavato…
Bene o male, v’ha fatt’ ‘o servizio…
Dice “ ’O cunto purtatel’ a me”.
Pulicenella sapìte chi è?
…Perepè …perepè …perepè.

Pulicenella ha signato, guardato,
dint’o vico di tale… di tale…
s’hadda fa nu lavoro stradale;
s’hadda fa… ma però s’è fermato
Dice “ ’O cunto purtatel’ a me”.
Pulicenella sapìte chi è?
…Perepè …perepè …perepè.

Pulicenella te dice “Firmate
Questa causa l’abbiamo vinciuta”.
Sì sicuro ca già l’ ‘e perduta…
E cu tutto ch’ ‘e avut' 'e mmazzate…
Dice “ ’O cunto purtatel’ a me”.
Pulicenella sapìte chi è?
…Perepè …perepè …perepè.

Pulicenella le piaceno ‘e ccarte
spicialmente… si songhe sigante.
Chelli bbone s’ ‘e tten’ astipate
'e ssuggette t’ ‘e mmen’ jnt’ ‘e scarte…
Dice “ ’O cunto purtatel’ a me”.
Pulicenella sapìte chi è?
…Perepè …perepè …perepè.

Pulicenella è spasssuso... Se spassa
quanno port’ ‘e cartelle arretrate…
Sono imposte d’uscita e d’entrata,
però isso nun pava na tassa.
Dice “ ’O cunto purtatel’ a me”.
Pulicenella sapìte chi è?
…Perepè …perepè …perepè.

Pulicenella fa mille mestiere:
‘o barbiere, ‘o stagnaro, ‘o pittore,
l’architetto, ‘o ngignere, o’ duttore.
Sap’ ‘o munn’ ‘e diman’ e d’ajere…
Dice “ ’O cunto purtatel’ a me”.
Pulicenella sapìte chi è?
…Perepè …perepè …perepè.

Pulicenella fa pur’ ‘o scrittore.
E s’abbacca cu chist’ e cu chilo…
Ten’ ‘a penna, e nu core tantillo…
e se joc’ ‘a parola d’onore.
Dice “ ’O cunto purtatel’ a me”.
Pulicenella sapìte chi è?
…Perepè …perepè …perepè.

Pulicenella è padron’ ‘e paese.
Sape vita miracul’ e morte.
P’ ‘e ppertose, p’ ‘e ssenghe e p’ ‘e pporte
mette recchie… e s’ ‘a squaglia all’inglese.
Dice “ ’O cunto purtatel’ a me”.
Pulicenella sapìte chi è?
…Perepè …perepè …perepè.

Pulicenella se mena d’ ‘o lietto,
quanno tras’ ‘o vapore int’ ‘o porto.
E nunnn’ave né colpa né tuorto,
quann’ afferr’ ‘o straniero pè pietto…
Dice “ ’O cunto purtatel’ a me”.
Pulicenella sapìte chi è?
…Perepè …perepè …perepè.

(Eduardo De Filippo [1949])


AIUTO:

tunno: tondo; nu fisso: un tizio; vizie d' 'a rosamarina: vizi del rosmarino, che è duro, ma di sapore gradevolissimo; se sceta: si sveglia; se ntalléa: cerca pretesti per non andarsene (da talèa: radici: metter radici); addereto: dietro; appura: viene a sapere; 'o tramm' è scassato: il tram è rotto; avut' 'e mmazzate: stato battuto; 'e ssuggette: le carte soggette; stagnaro: idraulico; s'abbacca: s'accorda, fa combutta; p' 'e ppertose: per i buchi; p' 'e ssenghe: per le fessure; recchie: orecchie.

Interpretazione di Gigi Proietti [1978]